តំបន់ទេសចរណ៍ខេត្តកែប

ប្រវត្តសង្ខេប ខេត្តកែប

ទីក្រុងកែប ជាទីក្រុងទេសចរណ៍ឆ្នេរសមុទ្រ មានទីតាំងស្ថិតនៅភាគនិរតីនៃរាជធានីភ្នំពេញ។ ភ្ញៀវទេសចរ អាចធ្វើដំណើរ ពីរាជធានីភ្នំពេញមកក្រុងកែប តាមផ្លូវជាតិលេខ៣ កាត់តាមខេត្តកំពត មានចំងាយប្រមាណ ១៧៣ គ.ម ឫ តាមផ្លូវជាតិលេខ ២ កាត់តាមខេត្តតាកែវ ឫក៏ អាចធ្វើដំណើរ តាមរថភ្លើង មកចុះនៅស្ថានីយ៍ តំណាក់ចង្អើរដែលមានចំងាយ ពីក្រុងកែប ៧ គ.ម។ ភ្ញៀវទេសចរបរទេស អាចធ្វើដំណើរ ពីប្រទេសវៀតណាម មកក្រុងកែបតាមច្រកហាទៀង ព្រែកចាក ដែលមានចំងាយប្រមាណ ៤០ គ.ម។ តាម ផ្លូវសមុទ្រ ភ្ញៀវទេសចរអាចជិះទូក កប៉ាល់ពីក្រុងព្រះសីហនុ និង ពីប្រទេសវៀតណាម មកកំពង់ផែ ក្រុងកែប ផងដែរ។

ខេត្តកែប បានកសាងឡើងក្នុងអំឡុងឆ្នាំ ១៩០៨ ក្នុងសម័យអាណានិគមបារាំង។ ខេត្តនេះបានកែលំអ ឲ្យក្លាយជា ទីក្រុងទេសចរណ៍ឆ្នេរសមុទ្រ ដ៏ប្រណិតមួយក្នុងទស្សវត្សទី៦០ នាសម័យរាជរដ្ឋាភិបាល សង្គមរាស្រ្តនិយម។

ឈ្មោះខេត្តកែបនេះ បានក្លាយមកពីពាក្យបារាំង “Le cap” ប្រែមកជាពាក្យខ្មែរ គឺ ជ្រោយ មានន័យថា ដីដុះលយទៅសមុទ្រ។

កែបជាក្រុងមួយតូចចង្អៀត សំរាប់អ្នកទេសចរគ្រប់ប្រភេទ ប៉ុន្តែតំបន់នេះជាតំបន់ទីផ្សារ នៃសត្វសមុទ្រស្រស់ៗ សំរាប់អ្នកទេសចរនៅក្នុងប្រទេស ដូចជា ក្តាម​​ ខ្យង និង ម៊ឹក បង្គារជាដើម។ ចំណែកឯតំបន់កំសាន្តវិញ គឺមានតែ ឆ្នេរក្រុងកែបមួយប៉ុណ្ណោះ សំរាប់ងូតទឹក ដែលមានប្រវែងប្រមាណ ១ ០០០ម៉េត្រ។ តំបន់នេះ ប្រភេទខ្សាច់សមុទ្រ មានពណ៍ខ្មៅ ខុសពីខ្សាច់ក្រុងព្រះសីហនុ ដែលមានខ្សាច់ពណ៍ស។

• ភ្នំសសៀ

ភ្នំសសៀ ជារមណីយដ្ឋានវប្បធម៌​ និង​ ធម្មជាតិរបស់ក្រុងកែប មានទីតាំងនៅប៉ែកអាគ្នេយ៍ និង មានចំងាយ ១៤ គ.ម ពីក្រុងកែប។