៣ ស្ថាប័ន​រួម​គ្នា​ផ្តល់​ជំនួយ​បច្ចេកទេស​តម្លៃ ១,២៥ លាន​ដុល្លារ​ដល់​កម្ពុជា

ភ្នំពេញ: ធនាគារ​អភិវឌ្ឍន៍អាស៊ី ប្រទេស​ជប៉ុន និង​ប្រទេស​លុច​ហ្សំ​បួ​រ នឹង​ផ្តល់​ជំនួយ​បច្ចេកទេស ដើម្បី​ជួយ​ដល់​ប្រទេស​កម្ពុជា លើ​កម្មវិធី​កំណែទម្រង់​ហិរញ្ញវត្ថុ ដែល​មាន​តម្លៃ​ប្រមាណ​ជា ១,២៥ លាន​ដុល្លារ ។

​ ​យោង​ទៅ​តាម​សេចក្តីប្រកាស​ព័ត៌មាន របស់​ធនាគារ​អភិវឌ្ឍន៍អាស៊ី​ប្រចាំ​នៅ​ក្នុង​ប្រទេស​កម្ពុជា កាលពី​ថ្ងៃ​ទី​០៥ ខែ​កុម្ភៈ នេះ​បានឲ្យដឹងថា តាមរយៈ​ជំនួយ​បច្ចេកទេស​នេះ ក្រសួង​ចំនួន​៣ គឺ​ក្រសួង​សេដ្ឋកិច្ច និង​ហិរញ្ញវត្ថុ ក្រសួង​ពាណិជ្ជកម្ម និង​ធនាគារ​ជាតិ​នៃ​កម្ពុជា​នឹង​ធ្វើការ​រួមគ្នា អភិវឌ្ឍន៍​ប្រព័ន្ធ​គោលដៅ​ទីផ្សារ​ហិរញ្ញវត្ថុ ដើម្បី​ពង្រឹង​ធនធាន​ទាំងឡាយ នៅ​ក្នុង​ការធានា​កំណើនសេដ្ឋកិច្ច ។ តាមរយៈ​គម្រោង​នេះ រដ្ឋាភិបាល​នឹង​ធ្វើកា​រលើ​គម្រោង​ការសំខាន់ៗ​ចំនួន ១៣ ដោយ​រួមទាំង​ការពង្រឹង​ការត្រួតពិនិត្យ​ធនាគារ និង​ការកែលំអរ​គម្រោង​ច្បាប់ និង​បទដ្ឋាន​ផ្សេងៗ ព្រមទាំង​ជំរុញ​នូវ​ការជួយ​ទ្រទ្រង់ ដល់​ក្រុមប្រឹក្សា​អាជ្ញាកណ្តាល​ជាតិ ដែល​ទើបតែ​បង្កើតឡើង​ថ្មីៗ ហើយ​និង​ច្បាប់​កុងត្រា​ពាណិជ្ជកម្ម​ជា​ដើម ។​

​ ​ប្រភព​ដដែល​នោះ​ក៏​បានឲ្យដឹង​ទៀតថា ទឹកប្រាក់​ជំនួយ​បច្ចេកទេស​នេះ ក៏​នឹង​ជួយ​លើក​កំពស់​ដល់​ប្រព័ន្ធ​ទូទាត់​ជាតិ ហើយ​និង​ជំរុញ​ការបង្កើត​ការិយាល័យ​ព័ត៌មាន​ឥណទាន នៅក្នុង​ធនាគារ​ជាតិ​ផងដែរ ។​

​ ​គម្រោង​កម្មវិធី​កំណែទម្រង់​ហិរញ្ញវត្ថុ​នេះ មានតម្លៃ​ប្រមាណ​ជា ១,៤ លាន​ដុល្លារ នៅក្នុង​នោះ ៧៥០.០០០ ដុល្លារ​ផ្តល់​គឺជា​ជំនួយ​ឥត​សំណង​របស់​រដ្ឋាភិបាល​ជប៉ុន និង ៥០០.០០០ ដុល្លារ គឺជា​ជំនួយ​ឥត​សំណង​របស់​រដ្ឋាភិបាល​លុច​ហ្សំ​បួ​រ តាមរយៈ​ធនាគារ​អភិវឌ្ឍន៍អាស៊ី ហើយ​ចំណែក​នៅ​សល់​ចំនួន ១៥០.០០០ ដុល្លារ គឺជា​គម្រោង​ទឹកប្រាក់​បដិភាគ​របស់​រដ្ឋាភិបាលកម្ពុ​ជា ៕www.cen.com